چھٹیوں پر جانا بھی ایک الجھن کا کام ہے ۔پیکنگ کرو،پھر کھولو ،پھر دوبارہ پیکنگ کرو۔یہ دیکھنا کہ سفر کے تمام کاغذات موجود ہیں۔جن کے بغیر سفر کرنا ناممکن ہوتا ہے۔
اور اگر آپ بچوں کے ساتھ سفر کر رہے ہیں تو اس کی تو پریشانی ہی الگ ہوتی ہے۔صرف وہاں جانا ہی نہیں بلکہ ایک اور چیز جو ہمیں اور زیادہ پریشان کرتی ہے وہ ہے بیمار پڑ جانا۔ چھٹیاں خیریت کے ساتھ گزارنے کے لئے ہم اپنے ساتھ اینٹی الرجی اور اینٹی بائیوٹک گولیاں رکھتے ہیں ۔لیکن ہم خود کو ایک ساتھ بیمار پڑنے سے بچا بھی توسکتے ہیں ۔
ذیل میں دئیے گئے کچھ آسان طریقوں کی مدد سے ہم خود کو بیکٹیریا سے بچا سکتے ہیں ۔

چھٹی کے لئے خود کو تیار کرنا:

چھٹیوں کے لئے خود کو تیار کرنے کا مطلب یہ نہیں کہ آپ سفر کے لئے ضروری چیزیں پیک کرلیں بلکہ ساتھ ہی اپنے جسم کو بھی اس کے لئے تیار کریں۔سفر پر نکلنے سے پہلے رات کی ۸ گھنٹے کی نیند پوری کریں۔اپنے جسم کو سیراب رکھنے کے لئے زیادہ سے زیادہ پانی پیئیں ۔
اور اگر آپ ملک سے باہر جا رہے ہیں توسفر سے پہلے ضروری ویکسی نیشن ضرور کرائیں۔

اپنے ہاتھ دھوئیں:

ہم جانتے ہیں کہ بچپن سے ہی ہمیں یہ بات کہی جاتی رہی ہے لیکن مسئلہ یہ ہے کہ ہم اب بھی اسے بھول جاتے ہیں ۔
اگرچہ ہم اپنے گھر اورملک میں سستی دکھا جاتے ہیں لیکن غیر ممالک میں جاکرہاتھ دھونایاد رکھنا نہایت ضروری ہے۔ہاتھوں کی صفائی کے لئے اچھی جگہ سے لیا گیا ہینڈسینیٹائزر کافی نہیں ،یہاں آپ کا پرانا صابن ہی چلے گا۔ہاتھ دھوئیں،صابن ملیں اور دوبارہ دھوئیں ۔

بوتل کا پانی پیئیں:

کچھ ممالک اپنے حفظان صحت پر بنائے گئے اصولوں اور صفائی پر فخر کرتے ہیں ۔اور انھوں نے جگہ جگہ پینے کے پانی کے فوارے لگا رکھے ہیں ۔یہ سب اچھا ہونے کے باوجود بیماری سے بچنے کے لئے ہم آپ کو بوتل کا پانی پینے کا مشورہ دیتے ہیں۔
اگر آپ کا قیام ہوٹل میں ہے تو روم سروس آپ کو ہر روز پانی کی بوتلیں فراہم کرے گی۔کہیں بھی باہر جاتے ہوئے آپ یہ بوتلیں اپنے ساتھ لے جاسکتے ہیں ۔اور اگر آپ کو یہ بوتلیں خریدنا بھی پڑیں تو خیال کرلیں کہ آپ یہ خرچہ اپنی صحت کے لئے ہی کر رہے ہیں ۔
کیونکہ ہم دیسی لوگ باہر کے ممالک میں کھانوں پر تو خوب پیسہ خرچ کردیتے ہیں لیکن پانی کی ایک بوتل پر چند پیسے خرچ کرتے ہوئے بالکل ہی کنجوس بن جاتے ہیں ۔

آنسو صرف جذبات نہیں بلکے صحت بھی

مناسب نیند لیں :

ہم میں سے اکثر سمجھتے ہیں کہ چھٹیوں کا مقصد ہی خود کو تھکانا ہے۔کیونکہ ہم سارا وقت گھومنا پھرنا چاہتے ہیں ۔ہمیں جن جگہوں پر جانا ہے ان کی فہرست تیار کرنے کے ساتھ یہ بھی خیال رکھنا ہے کچھ وقت خود کو بھی دینا ضروری ہے۔
اپنے جسم اور ذہن کو تھکانے کا مطلب یہ ہوا کہ ہم ہوا میں موجود بیکٹیریا کا شکار بننے کے لئے تیار ہو گئے ہیں ۔کیونکہ تھکن کی وجہ سے ہمارے جسم کی دفاعی طاقت کم ہو جاتی ہے۔لہٰذا نیند کے لئے وقت نکالیں اور6 گھنٹے ضرور سوئیں کیونکہ نیند کے دوران ہی ہمارے جسم میں خون کے سفید خلیات بنتے ہیں۔

ہر چیز نہ کھائیں:

جہاں تک ہم جانتے ہیں دوران سفر زیادہ تر گلی کوچوں میں ملنے والا کھانا ہی کھایا جاتا ہے۔اور ان میں سے ہی کوئی کھانا ہمیں بیمار کردیتا ہے۔
لہٰذا اس بات کو خیال کرتے ہوئے مضر صحت کھانا کھانے سے گریز کریں۔یعنی کوشش کریں کہ جو کچھ بھی آپ کھائیں وہ تازہ ہو ،اچھی طرح پکا ہوا ہو اور گرم گرم پیش کیا جائے۔

انگریزی میں پڑھنے کے لئے کلک کریں 

ترجمہ :سعدیہ اویس

The post چھٹیوں میں بیماری سے کیسے بچیں؟ appeared first on ایچ ٹی وی اردو.

اسکول صرف تعلیم حاصل کرنے کی ہی جگہ نہیں بلکہ یہاں صلاحیتوںاور معاشرتی تعلقات کو بڑھانے کا بھی موقع ملتا ہے۔بہت سے ایسے بچے جو اپنے گھر میں اکیلے ہوتے ہیں انھیں اسکول جاکر نئے دوست بنانے کا موقع ملتا ہے ۔ایسے بچے گھر میں لمبی چھٹیاں گزارنے کے بعددوبارہ اسکول جانے پر بہت خوش ہوتے ہیں۔جبکہ بعض بچے اسکول جانے کا تصور کرکے پریشان ہوتے ہیں اورلمبی چھٹیوں کے بعد اسکول جانے سے گھبراتے ہیں ۔لمبے عرصے گھر پر رہنے کے بعد بچے اسکول جاتے ہوئے خوف زدہ ہوتے ہیں اوران کا ذہن اس تبدیلی کو فوری طور پرقبول نہیں کرتا۔

اگر آپ کابچہ بھی اسکول جاتے ہوئے گھبرا رہا ہے تو ان طریقوں کے ذریعے آپ اپنے بچے کواسکول جانے پر آمادہ کرسکتے ہیں اس طرح وہ بھی دوسرے بچوں کی طرح خوشی خوشی اسکول جائے گا ۔

اپنے بچے سے اسکول جانے کے بارے میں بات کریں:

اپنے سے اسکول جانے کے بارے میں خوشگوار باتیں کریں ۔اسے بتائیں کہ اسکول جا نے پر وہ اپنے دوستوں اور اساتذہ سے ملے گا۔سب ایک دوسرے کو اپنی چھٹیوں کے بارے میں بتائیں گے کہ انھوں نے یہ چھٹیاں کیسے گزاریں ۔اپنے بچے سے اس کی پریشانی کی وجہ جاننے کی کوشش کیجئے کہ وہ اسکول جانے سے کیوں گھبرا رہا ہے اس طرح جب وہ آپ کو اپنی پریشانی بتائے گا تو آپ اس کا بہتر حل نکالنے کی کوشش بھی کریں گے۔

اسکول کھلنے سے چند دن پہلے سے نیند کا روٹین صحیح کریں :

چھٹیوں میں بچے رات کو دیر سے سوتے اور دیر سے ہی اٹھتے ہیں ۔اس لئے اسکول کھلنے کے بعد پرانے روٹین پر آنا خاصہ مشکل ہو جاتا ہے ۔اس لئے اسکول کھلنے سے چند دن پہلے سے بچے کو جلدی سونے اور جلدی اٹھنے کے روٹین پر لائیں تاکہ اسکول کھلنے تک وہ اپنے پرانے روٹین پر آجائے۔

بچوں کی جنسی نشوونما سے متعلق ضروری معلومات

پڑھائی کا ماحول بنائیں :

لمبے عرصے تک کتابوں اور پڑھائی سے دور رہنے کے بعد بچوں کو دوبارہ پڑھائی شروع کرنا بہت مشکل لگتا ہے ۔اس مسئلے پر قابو پانے کے لئے اسکول کھلنے سے چند دن پہلے سے اپنے بچے کو کتابوں کا مطالعہ کرنے پر آمادہ کریں ۔اس کے لئے ایسی کتابوں کا انتخاب کریں جنھیں وہ پڑھنا پسند کرتا ہے۔اس کے علاوہ جو اسباق وہ چھٹیوں سے پہلے اسکول میں پڑھ چکا ہے یا آگے پڑھے گا ان کو بھی پڑھوائیں تاکہ اسکول جاکر انھیں پڑھنے اور سمجھنے کا شوق پیدا ہو ۔اس طرح ناصرف اس میں خود اعتمادی آئے گی بلکہ اسکول جاکر نئی چیزیں سیکھنے کا شوق بھی پیدا ہوگا۔

اسکول لے جانے والی چیزوں کی خریداری کریں:

بچوں کا جسم تیزی سے بڑھتا ہے اس لئے ان کے کپڑے اور جوتے جلدی چھوٹے ہو جاتے ہیں اور ہر سال نئے لینا پرتے ہیں ۔اسی طرح بیگ اورپانی کی بوتل بھی نئی لینا پڑتی ہے۔یہ چیزیں نہ تو چھٹیاں شروع ہوتے ہی لیں اور نہ ہی اسکول کھلنے سے ایک دن پہلے ،اسکول کھلنے سے ایک ہفتہ پہلے جاکر یہ تمام چیزیں خریدیں اور اپنے ساتھ اپنے بچے کو ضرور لے جائیں تاکہ وہ اپنی پسند کی چیزیں خرید سکے۔اس طرح بچے کو اپنی پسند کی چیزیں استعمال کرنے کے لئے بھی اسکول جانے کی جلدی ہوگی۔

پہلے دن بچے کے ساتھ آپ بھی اسکول جائیں :

پہلے دن بچے کو اسکول چھوڑنے آپ خود جائیں اگر ممکن ہو تو اس کی کلاس میں جاکر اسے اس کی نئی ٹیچر سے ملوائیں تاکہ وہ ٹیچر سے بے تکلف ہو سکے۔اگر آپ کا بچہ پہلی بار اسکول جارہا ہے تو اس کی دوستی دوسرے بچوں سے کرائیں اس طرح وہ کلاس میں خوش رہے گا ۔اگر اسکول چھوڑتے وقت بچہ رونے لگے تو اسے سمجھائیں کہ وہ یہاں اچھی طرح رہے گا اور اسکول کے بعد آپ اسے لینے آجائیں گے۔

جب بچہ اسکول جانا پسند نہیں کرتا تو اس کو اسکول اور تعلیم کی اہمیت سے آگاہ کریں اسے بتائیں کہ کس طرح اسکول جاکر اس کی زندگی سنور سکتی ہے۔اسے بتائیں کہ وہ جو کچھ اسکول میں سیکھے گا وہ اس کے کس طرح کام آئے گا ۔اسے یہ بھی بتائیں کہ اس کی طرح دوسرے بچوں کو بھی اسکول جانا اچھا نہیں لگتا لیکن پھر آہستہ آہستہ وہ اس کے عادی ہو جاتے ہیں اور ان کی یہ پریشانی ختم ہو جاتی ہے۔

اس بارے میں جانئے :آنکھوں کا رنگ صحت کے بارے میں کیا کہتاہے

The post لمبی چھٹیوں کے بعد بچے کو دوبارہ اسکول جانے پر کیسے راضی کریں appeared first on ایچ ٹی وی اردو.