اپنی شخصیت رنگوں میں ڈھونڈیں

رنگوں کا اثر آپ کی زندگی پر بہت زیادہ ہوتا ہے ،اچھے رنگ پہن کر آپ خوشگواریت محسوس کرتے ہیں ،آپ کو اپنا موڈ بھی اچھا لگتا ہے ،موسم ،جگہ ،ہر چیز سے خوشگواریت کا احساس ہوتا ہے، خواہ ماحول کیسا بھی ہو وہ حقیقتاً اردگرد موجود افراد اور ان کی شخصیات کا پیدا کردہ ہوتا ہے ،تو آپ اپنی موجودگی سے لوگوں کو کیامحسوس کروانا چاہتے ہیں ؟آپ کی موجودگی سے دوسرا کیا تاثر لیتا ہے؟پہلے تو یہ طے کر لیں کہ آپ کس قسم کی شخصیت رکھتے ہیں ۔یہاں ہم آپ کو ایک کلر ٹیسٹ دے رہے ہیں جس سے پتہ چلے گا کہ آپ کی شخصیت کس طرح کی ہے ۔ہر ایک کی شخصیت کے کچھ رنگ ہوتے ہیں،یہاں 8رنگوں کے بارے میں ان کی خصوصیات کے بارے میں بتایا جا رہا ہے آپ ان میں سے اپنا رنگ تلاش کریں اور نیچے دی گئی خصوصیات سے اپنا موازنہ کر کے دیکھیں ،ہمیں یقین ہے کہ آپ کو یہ تجربہ دلچسپ لگے گا۔

مثبت سوچ:(زرد رنگ)

اگر آپکو سورج کی طرح چمکتا ہوا زرد رنگ پسند ہے ،تو اس کا مطلب ہے کہ آپ چھوٹی چھوٹی چیزوں سے متاثر ہو جاتی ہیں،اور ہر چیز کی آپ کی نظر میں اہمیت ہے کیونکہ آپ ہر چیز میں خوبصورتی تلاش کر نے والے لوگوں میں سے ہیں۔آپ یہ بات سمجھتی ہیں کہ کسی کی تعریف کرنا زیادہ بہتر ہے بجائے اس پر تنقید کرنے کے۔اس رنگ کو پسند کرنے والے درحقیقت مثبت سوچ رکھنے والے لوگ ہوتے ہیں ۔

ٹھنڈے مزاج اور امن پسند :(نیلا رنگ)

اگر آپکو نیلا رنگ پسند ہے جیسا کہ آسمان کا ہوتا ہے تو اس کا مطلب ہے کہ آپ میں قدرتی طور پر یہ صلاحیت ہے کہ آپ اپنی بات دوسرے تک بہت احسن طریقے سے پہنچا سکتے ہیں ،اور اپنے دوستوں میں صلح صفائی اور امن کے سفیر کا کردار اد کر سکتے ہیں۔آپ عام طور پر اپنی برداشت سے زیادہ تحمل کا مظاہرہ کر سکتے ہیں ۔آپ مشکل سے مشکل صورتحال میں بھی صبر اور ٹھنڈے مزاج سے قابو پا سکتے ہیں۔

مسابقت پسندی:(سرخ رنگ)

اگر آپ کو سرخ رنگ پسند ہے۔۔!توآپ میں لڑنے کی ہمت اور مقابلے کا دم ہے ،اور آپ کہیں بھی اپنی بات کو منوانے کا فن جانتے ہیں اور ہر معاملے میں بہت واضح موقف رکھتے ہیں ۔آپ کے پاس وہ پوزیشن رہتی ہے کہ جس میں طاقت آپ کے ہاتھ میں ہوتی ہے،اور آپ دوسرے پر حکومت کرتے ہو،آپ اپنے گروپ کے لیڈر ہوتے ہو۔آپ مزاج کے تیزہیں اور کوئی بھی مزاج کے خلاف بات آپ کو مشتعل کر دیتی ہے۔

ہر دلعزیز اور سوشل:(نارنجی رنگ)

نارنجی یا اور نج رنگ پسند کرنے والے عام طور پر اچھی طبیعت کے ،مقبول،اورہر دلعزیز شخصیت ہوتے ہیں ۔آپ بہت آسا نی سے اپنی مسکراہٹ اور اپنی گفتگوسے لوگوں کو دوست بنا لیتے ہیں ۔اگر یہ شادی شدہ ہوں تو اپنی دوستانہ طبیعت کی بدولت اپنے شریکِ حیات کے ساتھ تعلقات کو دوستانہ انداز میں ہلکے پھلکے انداز میں نبھاتے ہیں ،اگر غیر شادی شدہ ہوں تو بھی صنف مخالف میں خاصے مقبول ہوتے ہیں،یہ پیدائشی سیاستدان ہوتے ہیں ،یہ جو بھی پیشہ اختیار کریں اس میں اپنے ساتھیوں میں نمایاں نظر آتے ہیں ۔یہ شاذو نادر ہی سنجیدہ نظر آتے ہیں یا کسی بھی سخت اصول کی پابندی کرنا ان کے لئے ممکن نہیں ہوتا۔

ہر چیز میں توازن رکھنا جانتے ہیں:(سبز رنگ)

جن لوگوں کو سبز رنگ پسند ہے وہ اپنی راہ کا تعین کرنا خوب اچھی طرح جانتے ہیں ۔یہ بہت حساس،محترم،اور ذمہ دار ہوتے ہیں ،ایک حد تک منہ پھٹ ہوتے ہیں،جو لوگ سبز رنگ پسند کرتے ہیں وہ اکثرسوشل اور اپنے آس پڑوس کے لئے بہت تعاون کرنے والے اور اچھے پڑوسی ثابت ہوتے ہیں،اس کے علاوہ بہت دوست بناتے ہیں اور کسی نہ کسی سوشل آرگنائزیشن سے جڑے رہنا پسند کرتے ہیں ۔پارٹیز میں جانا ،ہلاگلا کرنا ،اچھا کھانا کھانا پسند کرتے ہیں ،یہ ہر حال میں چاہے وہ معاشی صورتحال ہو یا سوشل دونوں میں اپنے آپ کو ٹاپ پوزیشن میں رکھنا پسند کرتے ہیں،یہ مستقل دوستوں کی سنگت پسند کرتے ہیں۔

حساس اور تعمیری شخصیت:(جامنی رنگ)

جامنی رنگ پسند کرنے والے دو طرح کے لوگ ہوتے ہیں ،پہلے حساس ہوتے ہیں جو کہ اندر سے بہت گہری حساسیت رکھتے ہیں ،قوتِ برداشت بہت ہوتی ہے ،کری ایٹو ہوتے ہیں نت نئے خیالات اور آئیڈیاز پر کام کرنا پسند کرتے ہیں ۔اپنے کام کے ساتھ بہت مخلص ہوتے ہیں ۔اور دوسری طرح کے لوگ آرٹسٹ،تصوف کو پسند کرنے والے اور منفرد افراد ہوتے ہیں ۔اس طرح کے افراد کو دیکھ کر آپ کو ہر طرف نیکی ،مروت اور اچھائی کااحساس ہوتا ہے ۔ایسا لگتا ہے کہ دنیا میں کہیں جنگ،بیماری ،دکھ اور غربت نہیں ہے۔جامنی رنگ کو پسند کرنے والے پر کشش شخصیت کے مالک ہوتے ہیں ،اور آرٹ اور ادب کے دلدادہ ہوتے ہیں ،کچھ افراد خود بھی آرٹسٹ ہوتے ہیں۔

وقت کے ساتھ نہ بدلنے والی شخصیت:(بھورا رنگ)

براؤن رنگ پسند کرنے والے اپنے مقاصد کا تعین کر کے اپنا کام کرتے ہیں ۔اپنے احداف متعین کر کے ان کو حاصل کرنے کی سعی کرتے ہیں ،اپنی کوششوں کو کامیاب کرنا جانتے ہیں۔ان کی شخصیت میں وقت کے ساتھ ساتھ کوئی تبدیلی نظر نہیں آتی ،ایسا محسوس ہوتا ہے کہ وقت ان کو چھو کر گزر گیا ہے۔آپ کا ذہن بہت تیزی سے کام نہیں کرتا ،چیزوں کو سمجھنے میں تھوڑا سا ٹائم لگتا ہے لیکن آپ اپنی ذمہ داریوں کو سمجھتے ہیں ،آپ کے پاس ٹائم نہیں ہوتا کہ غیر حقیقی یا خیالی چیزوں پر اپنا وقت ضایع کریں۔

نفیس اور نازک:(گلابی رنگ)

گلابی رنگ پسند کرنے والے بھی دو طرح کے لوگ ہوتے ہیں ایک وہ جو بہت محفوظ زندگی گزارتے ہیں اور بڑے ہونے کے باوجود ان میں بچپن کی معصومیت نظر آتی ہے ،گلابی رنگ میں نفاست،نزاکت،اور اندر سے پاکیزگی نظر آتی ہے ۔نوجوان لوگ جو گلابی رنگ پسند کرتے ہیں وہ اپنے خیالوں اور خوابوں کی دنیا میں رہنا پسند کرتے ہیں اور ان کو لگتا ہے کہ زندگی بہت رومانٹک اور خوبصورت ہے ۔یہ سرخ رنگ کی ہی ایک قسم ہے ،اور عام طور پر اس کو پسند کرنے والی اپر یا مڈل کلاس کی خواتین ہوتی ہیں ۔