پھٹے ہونٹوں سے نجات پانے کے ٹوٹکے

سردیوں میں چلنے والی خشک ہوائیں ہونٹوں کو خشک اور کھردرا کر دیتی ہیں۔ ہونٹ اگر زیادہ خشک ہوجائیں تو وہ پھٹنے لگتے ہیں اور ان میں خون بھی آنے لگتا ہے ۔ اس تکلیف سے بچنے کے لیے کریم یا لپ بام لگایا جاتا ہے لیکن خشک ہوا کے باعث کچھ دیر بعد ہونٹ پھر سے خشک لگنے لگتے ہیں ۔ غرض یہ کہ پورا موسم ہی اس مشکل سے جونجنے میں نکل جاتا ہے ۔ہونٹوں کو نرم و ملائم رکھنے کے لیے ان کی مستقل دیکھ بھال کرنا ضروری ہے ۔ سردیوں میں کیونکہ ہوا میں نمی کم ہو تی ہے جس کی وجہ سے ہونٹوں کی نمی بھی بھاپ بن کر اڑ جاتی ہے ۔ اس موسم میں ہونٹوں کو پھٹنے سے بچانے کے لیے مندرجہ ذیل احتیاطیں کرناضروری ہیں:

*ہونٹوں کو قدرتی نمی فراہم کرنے کے لیے زیادہ سے زیادہ پانی پئیں ۔
*صحت بخش غذا کھائیں ۔ خاص طور سے سبزیاں ا ور پھل جن میں اینٹی آکسیڈنٹ کی خصوصیات موجود ہوں ۔
*جلد کو نرم و ملائم رکھنے کے لیے وٹامن اے اور سی کی ضرورت ہوتی ہے۔ دودھ، گاجر اور خوبانی میں وٹامن اے اور رسیلے پھل جیسے کہ لیمبو، موسمبی اور نارنجی میں وٹامن سی کثیر تعداد میں موجود ہوتا ہے ۔
*ہونٹو ں پر زبان پھیرنے سے گریز کریں ۔ ایسا کرنے سے ہونٹ مزید خشک ہو جاتے ہیں ۔ ہونٹوں پر زبان پھیرنے سے ان کی قدرتی نمی جاتی رہتی ہے ۔
*ہونٹوں کو بھی ایکسفولئیٹ کرنے کی ضرورت ہوتی ہے۔ کسی لائٹ سے اسکرب سے ہونٹوں کا انگلی کی مدد سے مساج کریں دھونے کے بعد لپ بام ضرور لگائیں ۔
*اپنے ہونٹوں کو تیز دھوپ سے محفوظ رکھیں۔ ویسے تو سردیوں کی دھوپ لینا اچھا لگتا ہے لیکن تیز شعاؤں سے ہونٹوں کی حفاظت کرنا ضروری ہے ۔اس کے لیے ہونٹوں پر سن اسکرین لگایا جاسکتا ہے۔
*بعض اوقات کچھ ٹوتھ پیسٹ ہونٹوں کو خشک کردیتے ہیں۔ اگر خشکی سے نجات حاصل نہیں ہورہی ہو تو ٹوتھ پیسٹ تبدیل کر کے دیکھیں ۔
*اکثر دانتوں پر بریسز لگانے والوں کو خشک ہونٹوں کی شکایت رہتی ہے۔ ایسی صورت میں اپنے ڈینٹسٹ سے مشورہ کریں ۔
*زیادہ تیز کیمیکل والی لپ اسٹکس سے اجتناب کریں ۔ قدرتی اجزا سے بنی لپ اسٹک خریدیں۔

پھٹے ہونٹوں کے لیے ٹوٹکے

1۔چینی

ہونٹوں کو ایکسفولیئٹ کرنے کے لیے چینی کا استعمال کیا جا سکتا ہے اس سے مردار جلد نکل جائے گی اور ہونٹ نرم وملائم ہو جائیں گے ۔
*دو چھوٹے چمچ چینی میں ایک چھوٹا چمچ شہدملائیں ۔ اس پیسٹ کو ہونٹوں پر لگائیں اور کچھ منٹ کے لیے لگا رہنے دیں ۔
* پھر اپنی انگلیوں کی مدد سے ہونٹوں کو ہلکے ہلکے ملیں ۔
*ہلکے گرم پانی سے دھو لیں ۔

2۔ شہد

شہد ایک بہترین موائسچرائزر ہے ۔ اس میں موجود اینٹی بیکٹیریل خصوصات پھٹے ہونٹوں کے لیے بہترین ہے ۔
*ایک دن میں ہونٹوں پر دو تین بار شہد لگائیں ۔
*آپ شہد اور گلسرین ملا کر بھی استعمال کر سکتی ہیں ۔ صبح نرم وملائم ہونٹ حاصل کرنے کے لیے رات میں ہونٹوں پر یہ بام لگائیں ۔

3۔گلاب کی پتیاں

گلاب کی پتیوں سے ہونٹ موائسچرائز بھی ہو جاتے ہیں اور ان کا رنگ بھی گلابی ہو جاتا ہے ۔
*گلاب کی پتیوں کو پانی سے اچھی طرح دھوئیں ۔ پھر انہیں گلسرین یا دودھ میں چند گھنٹوں کے لیے بھگو دیں ۔
*ان کا پیسٹ سا بنا لیں ۔اس پیسٹ کو دو سے تین بار ہونٹوں پر لگائیں ۔
* خاص طور پر سونے سے پہلے اس کا استعمال ضرور کریں ۔

4۔کیسٹر آئل

کیسٹر آئل سے ہونٹ نرم و ملائم ہوجاتے ہیں ۔
*کسٹر آئل دن میں دو تین بار ہونٹوں پر لگائیں ۔
*اس کے علاوہ آپ ایک چھوٹے چمچ کیسٹر آئل میں ایک چھوٹا چمچ گلیسرین اور چند قطرے لیمبو کے عرق کے ملائیں ۔اسے اچھی طرح مکس کر کے ہونٹوں پر رات کو لگائیں ۔ صبح اٹھ کر روئی کے ٹکڑے کو ہلکے گرم پانی میں بھگو کر اس سے ہونٹوں کو پوچھ لیں ۔

5۔ ملائی

یہ بہت پرانا اور آزمودہ ٹوٹکا ہے اور ایک بہترین قدرتی موائسچرائزر بھی ہے ۔
*تازہ ملائی ہونٹوں پر لگائیں۔ ہلکے گرم پانی میں روئی کو ڈبو کر اس سے ہونٹ صاف کرلیں ۔
*ہونٹ نرم وملائم ہونے تک اس عمل کو دن میں دو سے تین بار دہرائیں ۔