کراچی: ڈینگی کی علامات پر 100مریضوں کا علاج جاری

کراچی: اسپتالوں میں تشخیصی کٹس مو جود نہیں ،اسپرے مہم شروع نہ ہو سکی
کراچی میں ڈینگی وائرس کا سیزن شروع ہوگیا ہے تاہم صوبائی انسداد ڈینگی پروگرام کے سربراہ کی عدم توجہ سے ڈینگی وائرس سے نمٹنے کے لیے اس سال کوئی حکمت عملی مرتب نہیں کی جاسکی۔
شہر کے سرکاری اور نجی اسپتالوں میں 100سے زائد مریض ڈینگی وائرس کی علامات میں داخل کیے گئے ہیں۔ سرکاری اسپتالوں میں ڈینگی وائرس کی تشخیص کے لیے کٹس دستیاب نہیں ہیں۔انسداد ڈینگی پروگرام کے افسرکے مطابق پروگرام کے سربراہ نے سرکاری ونجی اسپتالوں میں ڈینگی وائرس سے متاثرہ مریضوں کے اعداد وشمار لینے سے انکار کردیا ہے۔ صوبائی ڈینگی پروگرام نے گزشتہ 6 ماہ سے سرکاری اور نجی اسپتالوں میں زیر علاج مریضوں کے اعداد وشمار ظاہر نہیں کیے ۔ماہرین طب کا کہناہے کہ متاثرہ مریضوں کی زندگی بچانے کے لیے پلیٹ لیٹس کی فراہمی یقینی بنائی جائے۔ شہر میں جراثیم کش اسپرے نہ ہونے سے مچھروں کی بہتات کی وجہ سے ڈینگی سے متاثرہ مریضوں کی تعداد بڑھ رہی ہے۔