محکمہ صحت کے افسران کلورین کی مقدار کو ما نیٹر کریں ،ڈپٹی کمشنر

ڈپٹی کمشنر ٹھٹھہ ندیم الرحمان میمن نے محکمہ صحت کے افسران کو ہدایت کی ہے کہ وہ ضلع کے تمام واٹر سپلائی تالابوں میں کلورین کی مقدار کو مانیٹر کریں اور پبلک مکامات پر فراہم کی جائیں تاکہ نگلیریا اور پانی سے پیدا ہونے والی دیگر بیماریوں سے بچا جا سکے۔
انہوں نے محکمہ صحت اور میونسپل کمیٹی کے افسران کو سخت ہدایت کی کہ وہ نگلیریا اور دیگر پانی سے پیدا ہونے والی بیماریوں سے بچاؤکیلئے فوری اقدامات اٹھاتے ہوئے تمام واٹر سپلائی تالاب سے پانی کے سیمپل لے کر اس میں کلورین کی مقدار کو چیک کریں ۔انھوں نے مزید ہدایت دی کہ وہ کلورین کی ٹیبلیٹ کو پانی کے تالابوں میں شامل کریں تاکہ نگلیریا و دیگر پانی کی بیماریوں سے بچا جا سکے۔واضح رہے نگلیریا ایک ایسا جر ثومہ ہے جو ناک کے ذریعے انسانی دماغ کو متاثر کر کے جان لے لیتا ہے۔ماہرین طب کے مطابق نگلیریا سے بچاو کیلئے پانی میں کلورین کی مقدار کو پورا کیا جائے جبکہ پانی کو 100 ڈگری پر ابالنے سے بھی اس جرثومے کو با آسانی ختم کیا جا سکتا ہے۔ نگلیریا کا جرثومہ صاف پانی میں پرورش پاتا ہے اور ناک کے ذریعے انسانی دماغ کی جھلی کو متاثر کر تے ہو ئے دماغ کو کھانے کی صلاحیت رکھتا ہے،جس سے موت واقع ہوجاتی ہے۔ طبی ماہرین کے مطابق نگلیریا سے بچاؤکیلئے پانی میں کلورین کی مقدار اعشاریہ 5 ہونا ضروری ہے۔ماہرین طب کا یہ بھی کہنا ہے کہ گھروں میں موجود ٹینکوں کو سال میں کم سے کم دو بار صاف کیا جائے،کلورین کی گولیوں کا استعمال کیا جائے۔