Aap Beeti: Motay say Patla Hona Mushkil hai?

Faitr Siddiqui Jan 22 2014
aap-beeti-motay-say-patla-hona-mushkil-hai

Bohat saray zindagi kay faislay agar sahi waqt pay ker liye jayein tu us ka asar app ki poori zindagi per perhta hai aur aesa hi kuch meinay bhi kiya ajj say 5 saal pehlay jub meinay apnay apnay app ko badalnay ka socha aur kar dikhayaa …

Apni zindagi ka pehla article likhnay jaraha hoon roman mein is umeed pay shayad meray mulk kay bhai behan meri is baat ko samgh kay zindagi behtar guzar saktay hein meri poori koshish hai kay mein app ko samjha sakoon kay motapa duniya mein eik gunnah hai …

Japan mein log is ko eik moozi beemari samghtay hein aur hamaray mulk mein yeh khatay peetay ghar ki nishaani samghi jaati hai … beharhaal 5 saal pehlay meray walid sahib ka inteqaal hua cancer say jo kay meri zindagi ka bohat takleef day marhalaa tha 4 saal jis aziyat aur  mushkil say guzaray woh  mein aur mera rub janta hai kay woh takleef kaisi thi Allah SWT kisi dushman ko bhi na day!

Meinay yeh baat sochni shroo kerdi woh kiya mohrikaat thay jo waja banay is hadsay ka phir meinay ghor kiya aur dekha kay hum khud apnay saath ziyadti kertay hein hamay is baat ka shaoor nahi kay hum mushkil halaat ya kam amadani mein kis tareeqay say apni zindagi ki quality ko behtar bana saktay hein.

Inteqaal kay baad mein kay eik American company pay naukri kar li woh company health aur fitness kay upper kam kerti hai zayada tar article likhti hai; kiyo kay meray walid sahib ko jo marz tha us marz ki waja say meinay bohat saray journal, articles or doctors doston say seekhaa aur parhaa aur phir is company kay sath kaam kiya tu yeh janaa kay jo hamara khana hai wohi hamari dawa hai …
Yakeen karein jo hum khatay hein hum waisay hi hojatay hein. Yeh eik aesi baat hai jo meinay khud dekhi parhkhi seekhi aur samghi …

Mera wazan 143KG tha aur kamar ka size 48 tha jo kay khatarnaak hud tak zayada tha mera BMI (Body Mass Index) 40 say uper tha jo kay eik khatarnak hud thi. Mughey saans lenay mein, chalnay phirnay mein, kam kernay mein aur baat tak kernay mai dushwaari ka saamna hota tha, lehaaza eik din raat mein mera dum ghutnay laga aur mughey aesa lag raha tha koi mera dum ghot raha hai us waqt meri umer sirf 26 saal thi mein yeh samghna shroo hogaya shayad maut ka farishta areeb kareeb mein kahi hai …

Mein gahbra kay uth kay beth gaya aur kafi dair tak betha raha mughey andaza hua meray phepron (lungs) ko oxygen ki kami horahi hait u mein apnay ghar kay terrace pay jakay beth gaya aur jub meray ausaan poori trah bahaal hue tu mainay us waqt yeh socha kay mughey apna wazan kam kerna hai aur meinay faisla kerliya kay bus ab apna wazan qaboo kerna hai

Meinay subha uthtay saath hi meinay apna BMR check kiya mughey apnay height aur weight kay hisaab din mein kitni calories leni chaiyeh aur us ka khoraat ka intekhaab kerna chaiyeh jis say mein apna wazam kam kersakoon aur mughey kisi kisam ki kamzori ya meray chehray main naqahat kay asaar numaya na ho …

Shroo shroo mein mainay 10 min say chehal qadmi start ki aur us ko barhata kiya, apni wazan kay hisaab say 2000 cal tak kay khanay shroo kia aur who khanay chorh diya jin say app ka wazan barhta hai maslan: Safed attay ki roti, safaed chawal, bakery kay items, pizza, burger, cold drinks, salaan, tarkay waali daal aur chaawal, chatni, meetha, gaye ka ghost aur who saari chezain jo processed hon masla cheese, hot dogs, aur pack khanay ki ashiya meinay yeh sub chorh diya …  is diet ko ‘The Paleo Diet’

Yeh saari cheezain chorhnay kay baad shroo shroo mein mughey apni duniya ajeeb lagni shroo hogayee shayad meinay apnay sath ziyadi kerli lekin phir mughey yeh sub cheezain achi lagni lagi chehal qadmi ab taiz walk main tabdeel ho chuki thi aur us ka waqt 10 min say 20 min ho chukka thaa …

Khair mein eik din yaani itwaar ka din jo kay mera cheat day hota tha us mei sub khata thaa, han eik baat mein yaha mention kerdoon kay paani main khoob peeta tha jis say meray cheray pay jhurriyan nahi pari…

Sirf 3 mahinay mein apna wazan 143 KG say 115 KG kiya jo meray liye eik bari kamamiyabi thi beharhaal yeh paleo diet mein karta gaya aur exercise barahatha gaya …

Aaj mera wazan 98KG aur mei takreeban 6KM bhaagta hoon 30 min mein jo kay meray liye eik aezaz ki baat hai aur mai khud ko bohat mutmain samghta hoon!
Ajj mera BMI jo  kay 40 say uper tha ajj 25 hai, lekin han eik baat mein batana chahoon ga kay yeh sub kuch app kay deeamgh ki taqat ka nateeja hai …

App eik faisla kerlain aur us pay atal hojayein aur us ko kar kay chorain Allah SWT app ki madad karain gay aur app ko nazar aye ga. Mein app say yeh nahi keh raha kay app subha sham is mehngay daur mei fruit khayein ya chicken khaiyein lekin han hum aetaydaal mein kha kay wazan apna control mein rakh saktay hein…

Apnay motay doston kay sath yeh meri aap beeti zaroor share kijiye ga neechay comment box hai zaroor likh kay batayein app nay kiya seekha meri is choti si article numa kahani say …

Duaon ka talabgaar …

Fatir Siddiqui

Faitr Siddiqui

Faitr Siddiqui:

An MPhil candidate for management sciences, he has done his MS and MBA, and he carries more than eight years of experience under his belt while working for the health-wellness website industry. An electronic music fan who loves healthy eating and the beach.